Taken from: Plagij.at

Post Global Recordings во своето постоење од година дена, зад себе има пет музички изданија и три мини галерии со фотографии. Вечерва во Менада, со почеток во 22:00 часот, ќе го прослави својот прв роденден со настап на Amplidyne Effect.

Плагиј.ат: Кој е Мартин Георгиевски, а кој е Amplidyne Effect? Колку години постои првиот, а колку вториот? Дали Amplidyne Effect го потиснува Мартин само во творечкиот занос или неговото уметничко алтер его провејува и во се друго што прави?

Amplidyne Effect: Мартин Георгиевски е 24 годишен графички дизајнер и дипломиран информатичар, башка е тежок музички фанатик и колекционер на плочи и дискови 🙂
Amplidyne Effect е проект што го работам од 2009 година како соло импровизациска експериментална музика, а и соработувам со артисти од Америка, Аргентина, Англија и Македонија. Amplidyne Effect повеќето ме потиснува на музичкото алтер его, бидејќи големо хоби ми е да стварам еден вид на експериментална музика, а и секогаш сум во потрага по друг вид на звуци дали синтетички или природни кои би сакал да ги “искасапам” и искористам како музичка текстура, шум или глич.

Плагиј.ат: Бидејќи јас не сум ја имала таа чест, дали и кога македонската јавност имала можност да го слушне Amplidyne Effect во живо досега?

Amplidyne Effect: Сум настапувал неколку пати до сега, заедно со други артисти и како соло проект. Во повеќе наврати македонската јавност можеле да ме слушнат со разни проекти кои повеќето преоѓале према амбиентот и импровизациска музика. Имам настапувано во Инди паб, Кино Фросина, ФРИК Фестивал, БОШ Фестивал, Скопје Креативен викенд, Канал 103 итн.

Плагиј.ат: Си соработувал со музичари од Аргентина, Англија и Америка преку live streamили меил. Како е да се биде дома пред компјутерот, а да се работи заедно со некој од другата страна на земјината топка? Дали во креирањето на музиката е доволна комуникацијата преку мрежа, без човечката енергија на блискост и непосредна комуникација? Какви се плодовите од таа соработка?

Amplidyne Effect: Интересен концепт е поради тоа што денеска имаш многу можности преку интернет да соработуваш со луѓе и пријатели од други земји кои можеби и никогаш во живот не си ги видел. Искрено мислам дека работи и овој вид на комуникација, бидејки можеш да испратиш свое импровизациско парче, а друг артист да надополни врз тоа и да добиете комплетна трака која би траела од 10 минути до 1 саат. Постојат и многу проекти и веб платформи на интернет кај што можете да надополните со ваши инструментални креации, а на крај да добиете фантастичен музички производ на кој можеби работеле над 10 артисти од цел свет. Повеќето работевме преку е-меил или Скајп+лајв стрим на нашите импровизации, а тоа што испадна на крај беше баш необичен концепт на работење на музика.

Плагиј.ат: Досега немаш официјално издание, но затоа имаш огромен број импровизации снимени во живо. Можеш ли да ни кажеш нешто за Oldcast серијата?

Amplidyne Effect: Повеќето од “живите” импровизации во Oldcast серијата се снимани соло и во еден потег. Нивниот почеток обично личи на празно платно кое постепено се пополнува со звучни текстури, инструменти, органски и синтетички амбиенти итн. Крајниот “производ” е генеративна експериментална музика сниман во времетраење од 1 саат кој до некој степен и форма се разликува од претходно сниман сет. До сега имам во голем број непреработени сетови снимани во период од 2011 – 2013 година, а во комплет нивното времетраење е можеби нешто повеќе од 40 саата. Ме радува што постои веб платформа како Mixcloud за издавање на подолги подкасти, радио емисии и плејлисти, на кој успеав до сега да издадам скоро 16 саати музика во 33 делови.

Плагиј.ат: Кои се твоите директни музички влијанија, оние кој се евидентни, како и оние кои не можат да се препознаат во твојата музика?

Amplidyne Effect: Мои најомилени музички фаворити се The Verve, Guided by Voices, Radiohead, Sigur Ros, Exit Calm, Brian Eno, David Sylvian, My Bloody Valentine, Count Basie, Joy Division, The Antlers, Slowdive… а големо влијание за звукот на Amplidyne Effect учествуваат Spacemen 3, Brian Eno, Robin Guthrie, Thom Yorke, The Residents, Godspeed You! Black Emperor, Pink Floyd…

Плагиј.ат: Со тебе ќе настапат и Марко Куцуловски и Тони Димитров. Од кога постои и како настана оваа соработка?

Amplidyne Effect: Со Марко Куцуловски имам свирено заедно на Recession Session во La Kana, мислам дека е одличен виолинист и супер импровизатор. Со Тони имам на повеќе наврати настапувано заедно на радио и во живо со други артисти. Мислам дека оваа соработка би била интересна пошто повеќето сме артисти кои настапуваат импровизаторски во живо, а не сме работеле на студио проект. Секогаш барам и други артисти/музичари кои би сакале да ми се приклучат кога имам настап во живо, а сакаат да импровизираат и експериментираат со звуци.

Плагиј.ат: Настапот е инспириран и посветен на Philip Glass и филмот Koyaanisqatsi. Режисерот Godfrey Reggio изјавил, цитирам, “it’s not for lack of love of the language that these films have no words. It’s because, from my point of view, our language is in a state of vast humiliation. It no longer describes the world in which we live.” На јазикот Хопи, зборот Koyaanisqatsi значи „небалансиран живот“. Дали се сложуваш со оваа изјава и која беше причината токму оваа тема да биде избрана за утрешниот настап?

Amplidyne Effect: Се сложувам комплетно пошто и филмот го преставува нашиот дестабилизиран живот на оваа планета која сме ја нарекле Земја. Во еден сегмент сме поврзани со природата (на кој и некој начин ни фали), во друг архитектурата, консумеризмот, желбата за истражување и нашите лоши/добри креации како вид. Мојата музика и е инспирирана од интерполацијата на природата и цивилизацијата како.
Имам и посебна почит према музиката и минимализмот на Philip Glassи модерната класична музика, бидејќи ја има можноста и идејата да направи музика која се состои од неколку акорди и движења, а да испадне едно феноменално ремек дело.

Плагиј.ат: Како те прифаќа македонската публика и што очекуваш од утрешниот настап?

Amplidyne Effect: До сега на неколку наврати ме слушале во живо и повеќето им се свиѓал овој концепт помеѓу експериментална, амбиент и електронска музика. Обично линијата на експерименталниот жанр е по необичен во нашата средина, а до некој степен и неприфатлив. Но еве од мојот почеток до сега, сум приметил дека излегуваат артисти како и слушатели што го перципираат амбиентот и експерименталната музика, и се надевам дека така и ке остане.
Во Менада ќе настапиме со по електронски сет, веќе со “издадена” музика и еден сет скроз импровизациски.